«Жанды сабақтар»: Түркістанда тиімді жоба жалғасын тапты
Түркістан облысы кәсіпкерлер палатасы "Kazakh Tourism" АҚ-мен бірлесіп С.Сейфуллин атындағы №4 мектеп-лицейінің 6-сынып оқушыларына «жанды сабақтар» ұйымдастырды.
Жоба мақсаты – өткен сабақты іс жүзінде бекіту, оқушылардың ой-өрісін кеңейту.
«Жанды сабақтар» жобасы аясында оқушылар тарихи орындарда болып, белгілі тұлғалардың сабақтарын тыңдады.
Ерекше дәріс бүкіл тарихи деректерден сыр шертетін «Сапар» орталығында басталып, «Әзірет Сұлтан» кесенесі аумағындағы тарихи әрі туристік орындарда жалғасты. Экскурсия барысында оқушылар мол мағлұмат алып қана қоймай, құнды жәдігерлерді өз көздерімен көруге мүмкіндік алды.
Оқушылар сабақтан зор әсер алғандықтарын жеткізіп, ұйымдастырушыларға алғыстарын білдірді.
Түркістан облысы кәсіпкерлер палатасы директоры Тимур Нақыпбеков оқушыларға жаңа оқу жылында сәттілік тіледі.
Айта кетейік, 2020 жылдың сәуір айында Атамекен ҰКП мен "Kazakh Tourism" АҚ арасында туризмді дамыту бойынша Жол картасына қол қойылды. "Жанды сабақтар" жобасы Жол картасының маңызды компоненттерінің біріне айналды.
