Студенттік жатаханалар мен жекеменшік мектептер құрылысы кәсіпкерлерге тиімді ме?
Студенттік жатаханалар мен жекеменшік мектептер құрылыс жобаларын іске асырудағы мемлекеттік қолдау шаралары туралы «Road Show» форматында ақпараттық-түсіндіру іс-шарасы өтті. Аталған шараға Түркістан облысы кәсіпкерлер палатасы директоры Тимур Нақыпбеков, «Қаржы орталығы» АҚ өкілдері, мектеп директорлары мен кәсіпкерлер қатысты. .
«Атамекен» кәсіпкерлері палатасында өткен кездесуде Білім және ғылым министрлігінің «Қаржы орталығы» АҚ жүзеге асырылып жатқан жобалары жөнінен анық ақпаратпен бөлісті. Жоба бірнеше тараптардан тұрады:
- студенттік жатаханаларды салу және реконструкциялау;
- жан басына нормативтік қаржыландыру шеңберінде жекеменшік мектептерді салу және реконструкциялау;
- мемлекеттік білім беру жинақтау жүйесі («Aqyl» білім беру депозиті)
- мемлекеттік білім беру кредиті
Студенттік жатахана мен жекеменшік мектептер салуға ниетті азаматтар жобаға қатысу үшін ең алдымен капиталыңыз немесе қарыз қаражатын тартуға мүмкіндіктеріңіз, сондай-ақ жер учаскеңіз болуы қажет. Студенттік жатаханаларды салу жобасы жоғары сұраныста. Бұл жоба бойынша Түркістан облысы өңірлер арасында бірінші орында. Бүгінгі таңда елімізде студенттер тұруы үшін 63 мыңнан астам орын-жайды жасау қажет. Бұл мегаполистерден бастап облыстық маңызы бар қалаларға дейінгі еліміздің барлық өңірлеріне тән қажеттілік.
Мемлекеттен төлемдер мерзімі аяқталғаннан кейін объект құрылыс салушының меншігінде қалады. Жалғыз шарт 20 жылға объектінің нысаналы мақсатын өзгертуге ауыртпалықты тіркеу болмақ.
Сондай-ақ алдын ала жасалған шарттар, жергілікті бюджет қаражатынан нысаналы құрылыс, меншікті қаражат және демеушілік қаражат есебінен 2022 жылы 11 057 орындық 32 жатахана пайдалануға беру жоспарлануда.
