Бастау: Арыстық кәсіпкер әйел ұлттық қолөнерді дамытуда
Арыс қаласына қарасты Ақдала ауылының тұрғыны қолөнерші Алмагүл Есенқұлова 2 жыл бұрын «Бастау бизнес» жобасы бойына кәсіпкерлік білімін арттырып, «Еңбек» бағдарламасы арқылы қайтарымсыз грант ұтып алған.
Оған заманауи тігін мәшинесін сатып алып, кәсібін кеңейткен.
Кәсіпкер әйелдің ата-анасынан бастап, балаларына дейін қолөнермен айналысады. Он саусағынан өнер тамған ерекше отбасы ағаштан ою ойып, киізден байпақ тігіп, былғарыдан түрлі бұйымдар жасайды.
Есенқұловтардың отбасы мүшелерінің барлығы ұста. Мәселен, әкесі тастан түрлі заттың мүсінін жасап, үйінің ауласын гүлдендіріп қойған. Ал ұлдары – ағаш шебері. Жаңғақ, қаратал, шынар ағашынан ыдыс-аяқ пен домбыраның неше түрін жасайды.
Бүгінде өнерлі отбасы мемлекеттік бағдарлама арқылы кәсібін кеңейтіп, қолданбалы өнерді ауылдастарына үйретуді қолға алған.
Қолөнер шебері Алмагүл Есенқұлова ендігі мақсаты ауыл айналасынан үлкен өнер мектебін ашу.
Түркістан облысы кәсіпкерлер палатасы директоры Тимур Нақыпбеков ұста әулетінің бұл бастамасына сәттілік тіледі!
